All Posts By

rosa

Þessir hlutu Íslensku lýsingarverðlaunin 2020

By Fréttir

Íslensku lýsingarverðlaunin 2020

Alls voru 16 verkefni tilnefnd til verðlaunanna í ár.
Íslensku lýsingarverðlaunin 2020

Vinningshafar 2020

Íslensku lýsingarverðlaunin eru verðlaun sem veitir frumlegum, skapandi og snjöllum hugmyndum sem eru útfærðar á framúrskarandi hátt viðurkenningu. Verðlaunin eru afhent á tveggja ára fresti og innsend verkefni að þessu sinni voru fullgerð 2018-2019. Alls voru 16 verkefni tilnefnd til verðlaunanna í fjórum flokkum.

Verðlaunin eru að þessu sinni veitt á örlítið frábrugðinn hátt, en hefð er orðin fyrir því að vera með viðburð í kringum verðlaunaafhendinguna þar sem verkefnin eru sýnd gestum og verðlaunahafar krýndir með pompi og prakt! Vegna samkomubanns sem ríkir á landinu í dag þurfum við að bíða með að afhenda vinningshöfum viðurkenningu sína en athöfn verður skipulögð í haust.

Dómnefnd að þessu sinni var skipuð þeim:

  • Örn Guðmundsson rafmagnsverkfræðingur M.Sc, stjórnarmaður LFÍ og formaður dómnefndar
  • Soffía Valtýsdóttir arkitekt F.A.Í og kjörnefndarmaður LFÍ
  • Ágúst Gunnlaugsson lýsingarhönnuður hjá Norrlighting og SWECO í Osló

Dómnefnd mat innsendar tillögur út frá eftirfarandi megin viðmiðum:

Hugmyndafræði // Virkni // Sjónræn og fagurfræðileg atriði // Tæknileg útfærsla lýsingarkerfisins // Orkunotkun og umhverfisáhrif // Algild hönnun

Þau verk sem að þessu sinni hlutu Íslensku lýsingarverðlaunin voru þessi:

The Retreat at the Blue Lagoon í flokki lýsingarverkefni innanhúss.
Gamla Steinbryggjan í flokki lýsingarverkefni utanhúss.
Organs í opnum flokki.
Sole-Luna í flokki lampar og ljósbúnaður.

Ljóstæknifélag Íslands óskar vinningshöfum og aðstandendum þessara verka innilega til hamingju með verðlaunin.

Hér fyrir neðan má sjá frekari upplýsingar um vinningshafa
Íslensku lýsingarverðlaunanna 2020

Flokkar

Lýsingarverkefni innanhúss

Smærri eða stærri verkefni, þar sem lýsingarhönnun er mikilvægur þáttur í útliti og notkun rýmisins. Lýsing sem leggur áherslu á arkitektúr byggingarinnar eða uppbyggingu rýmisins og notkun, stuðlar að velferð og vellíðan. Eiginleikar geta t.d verið hvernig dagsljós, raflýsing, auk stýribúnaðar spila saman á sannfærandi hátt. Lýsingin ætti að vera hugsuð sem heild og hafa skýra hugmyndafræði og skapandi lausnir.
Lýsing utandyra getur verið partur af innanhússverkefni ef það spilar hlutverk með lýsingunni innandyra og heild verksins (byggingarinnar).

Lýsingarverkefni utanhúss

Smærri eða stærri verkefni, þar sem útilýsing er mikilvægur þáttur í útliti, notkun og virkni svæðisins og/eða mannvirkisins. Þar sem ljós og arkitektúr eða hönnun er hugsað sem heild og eykur sjónræna upplifun.
Tilnefningar geta verið garður, útisvæði, götulýsing, brú, torg, lýsing á framhlið byggingar, stytta eða önnur minnismerki, náttúrusvæði eða þess háttar verkefni.

Lampar og ljósabúnaður

Verðlaun veitt til þeirra sem bæta og fullkomna gæði hönnunar og ljóss sem hlýst af hönnun þeirra. Þetta getur verið frá lömpum, sérhönnuðum ljósabúnaði í verkefni til ljósgjafa eða ljósastýringar.
Varan verður að vera tiltæk á íslenska markaðnum eða partur af verkefni.

Opinn flokkur

Opinn flokkur fangar öll þau lýsingarverkefni og vörur sem eiga skilið sérstaka athygli vegna framúrskarandi hönnunar, áhrifa, frumleika eða sérstæðu.
Tilnefningar geta verið útstillingar, sýningar, ljóslist, tímabundnar eða fastar ljósa innsetningar og samþykkt lýsingarplön fyrir ákveðin svæði.

Lýsingarverkefni innanhúss

The Retreat at the Blue Lagoon

"The Retreat at the Blue Lagoon er fimm stjörnu hótel og heilsulind staðsett í miðju hrauninu sem umkringir lónið. Þarna sameinast veitingarstaður sem býður uppá íslenska matararfleifð, gistiaðstaða með glæsilegum herbergjum og steinefna ríkt Bláa lónið sem umkringir bygginguna. The Retreat opnar dyrnar fyrir töfrandi ferðalag sem samanstendur af slökun, endurnæringu og könnunarleiðangri þar sem hugur og líkami komast í nánd við náttúruna. Þetta er staður til að vinda ofan af amstri daglegs lífs og opnar dyrnar að einu af undrum veraldar."

Lýsingarhönnunin

"Til að varðveita töfra og innblásturinn sem náttúruleg íslensk lýsing býr yfir var arkitektónísk lýsing hönnuð til að skapa slakandi andrúmsloft og undirstrika sambandið milli náttúrunnar, mannslíkamans og arkitektúrsins. Grunnhugmyndin var sú að bjóða upp á hágæða og persónulega nálgun þegar kemur að gestrisni. Lagt var upp með heildræna nálgun, sérsniðna að yfirbragði arkitektúrsins, í þeim tilgangi að undirstrika form og blæbrigði umhverfisins.

Hugmyndafræðin á bak við lýsinguna byggði á því að skapa auðmjúkt samband milli arkitektúrs, náttúru og líffræði í rýmum byggingarinnar. Með þessa hugmyndafræði að leiðarljósi tókst að skapa hágæða og jafnframt einstaka rýmisupplifun þar sem ljósvist og arkitektúr vinna saman sem eitt." -segir í lýsingu hönnuðar á verkefninu.

LÝSINGARHÖNNUÐUR
  • Guðjón L. Sigurðsson, Reynir Örn Jóhannesson, Rósa Dögg Þorsteinsdóttir, Sandra Dís Sigurðardóttir, Liska
AÐRIR HÖNNUÐIR OG SAMSTARFSAÐILAR
  • Basalt arkitektar, Design Group Italia, Bláa Lónið, Verkís
VERKKAUPI
Bláa Lónið
ÁR

2018

Lýsingarverkefni utanhúss

Gamla Steinbryggjan

"Gamla Steinbryggjan kom í ljós þegar framkvæmdir við Tryggvagötu voru töluvert á veg komnar. Gamla bryggjan reyndist ótrúlega heil og ákvað Landmótun, í samráði við Reykjavíkurborg og Mannvit að innfella þessu sögufrægu bryggju inn í þáverandi hönnun á svæðinu."

Lýsingarhönnunin

"Hugmyndafræði verksins er innblásið af sænum, sögu og tengingu nærumhverfis við bryggjuna sjálfa í gegnum tímann. Frá byrjun voru bæði landslagsarkitekt og lýsingarhönnuður mjög vör um mikilvægi bryggjunnar í sögulegu samhengi og þeirri tengingu sem ný hönnun þyrfti að taka mið af.

Við hönnun lýsingar á svæðinu er borinn virðing fyrir gömlu bryggjunni og yfirborði hennar haldið óupplýstu að mestu. Hófstillt, dimmanleg lýsing umkringir bryggjuna og er hún að mestu falin í bekkjum, handriðum og veggjum ásamt því að sérhannaðir lampar vaka yfir bryggjunni. Umhverfi svæðisins myndar þannig jafnvægi við annars óupplýsta bryggju.

Hönnun svæðisins og lýsing gömlu Steinbryggjunnar eru ein heild og ber að líta á hana sem slíka. Hún er samspil gamalla og nýrra tíma. Í stað þess að gleyma því liðna er gömlu bryggjunni fagnað með umgjörð og ljósi. Hún virkar einföld í sniði, liggur vel í umhverfi sínu og kallar ekki á athygli, en þegar staldrað er við horft í kringum sig má finna í gegnum hönnun og lýsingu ótal atriði sem vísa í sögu svæðisins og næsta umhverfi." -segir í lýsingu hönnuðar á verkefninu.

LÝSINGARHÖNNUÐUR
  • Andri Garðar Reynisson, Mannvit
AÐRIR HÖNNUÐIR OG SAMSTARFSAÐILAR
  • Landslagsarkitekt: Landmótun
  • Lóðaþjónustan verktakar
VERKKAUPI
Reykjavíkurborg
ÁR

2019

Opinn flokkur

Organs

"Frá árinu 2007 hafði Sigga Heimis, iðnhönnuður unnið með glerlíffæri sem framleidd voru af hinu virta glerlistasafni Corning Museum of Glass í New York (CMOG) og sýnt þau víða um heim.

Með tilkomu nýrrar reglugerðar á Íslandi, sem gerir alla íslendinga sjálfkrafa að líffæragjöfum, spratt upp sú hugmynd að setja af samsýningu til þess að vekja athygli og til að fræða fólk um mikilvægi líffæragjafar en að meðaltali eru um 30 manns í mikillri þörf fyrir líffæragjöf á hverju ári hér á landi. Lýsingarhönnuðurinn Kristján Kristjánsson var einn af þeim sem tók þátt í sýningunni með það hlutverk að lýsa upp líffærin.

Sýningin opnaði í Ásmundarsal þann 11. Janúar 2019 og var opin til 17.Febrúar 2019.

Lýsingarhönnunin

Hvert líffæri fékk sína sérstöðu í lýsingarhönnuninni en samspil milli lita, forms, áferðar og gagnsæi glersins var notað til að ná fram hreyfingum og eiginleikum líffæranna. Mismunandi ljósasenur voru forritaðar til að herma eftir hreyfingum og virkni líffæranna til að sýna fram á einkenni líffæranna þegar þau eru virk í mannslíkamanum. Úr varð áhrifamikið og lifandi sjónarspil umhverfis listaverkin.

Notast var við endurnýttar ljósdíóður (LED) sem er ákveðin vísun í líffæragjöf þar sem líffærin hafa oftast lokið sínu verkefni í einum mannslíkama og eru endurnýtt sem lífsgjöf fyrir annan mannslíkama. Hver innsetning samanstóð af ljósdíóðum sem voru felldar inn í listaverkin til að ná fram ákveðnum ljósvörpum.

Ljósasenur glerlíffæranna fóru í gegnum tímalínu sem lýsti upp hvert líffæri fyrir sig og var miðpunktur ljósasenunnar þegar öll líffærin spila saman sem ein heild. Á endanum slokknaði á einu líffæri í einu þangað til að heilinn sýndi enga virkni og við það hófst tímalínan upp á nýtt.

Margmiðlun, hljóð og lýsing voru samstillt í tímalínu til að mynda eina heild og undirstrika fegurð glerlíffæranna og þá lífsgjöf sem líffæragjöf er." - segir í lýsingu hönnuðar á verkefninu.

LÝSINGARHÖNNUÐUR
  • Kristján Kristjánsson
AÐRIR HÖNNUÐIR OG SAMSTARFSAÐILAR
  • Sigga Heimis, 
  • Gagarín, 
  • Gunnar Árnason, 
  • Arnar Leifsson, 
  • Corning Museum of Glass USA
VERKKAUPI
Samsýning
ÁR

2019

Lampar og ljósabúnaður

Sole-Luna

"Sole Luna er lampi sem var sérstaklega hannaður fyrir The Retreat at the Blue Lagoon í samstarfi við iGuzzini sem framleiddu lampann. Hugmyndarfræði Sole-Luna er að framlengja töfra náttúrulegrar birtu á Íslandi inn í hótelherbergin og skapa svipuð áhrif eins og fást frá sólinni og tunglinu. Lampinn er festur á bak við dúkaloft þannig að ljósið síast í gegnum himnu dúksins. Þar sem ljósbúnaðurinn er staðsettur á bak við dúkinn sést sjálfur búnaðurinn ekkert.

Ljósahönnunin

Gestir hótelsins geta stýrt lýsingunni frá Sole-Luna með stýringu sem innbyggð er í rúmgaflinn og gerir þeim kleift að virkja mismunandi ljósasenur svo sem fyrir slökun, orku, dag og nótt. Þá er möguleiki á að framkalla lýsingu sem samsvarar tunglinu með svipuðum dökkum blettum og sjást á því með því að notast við blöndu af 4000K og 6000K ásamt því að slökkt er á nokkrum díóðum.

Einnig er möguleiki á því að bóka vakningu sem vekur gesti með ljósi sem stigmagnast hægt og rólega í fimm mínútur. Styrkur birtunnar fer úr 0% í 90% og frá hlýrri birtu yfir í kaldari birtu en þannig fá gestir tækifæri til að vakna hægt og rólega án þess að notast við hljóð.

Lampinn er 1,2m í þvermál og er samansettur af ljósdíóðum (LED) sem gefa frá sér mismunandi litarhitastig; 2100K, 4000K og 6000K. Styrkur birtunnar getur verið allt frá 1 lux og upp í u.þ.b. 1500 lux með 204 rafmagnsgreinum og sjö LED borðum sem tengjast inná hverja grein. Búnaðurinn er stýrður með DMX stýringu til þess að ná fram þeim ljósgæðum sem óskað var eftir." - segir í lýsingu hönnuðar á verkinu.

LÝSINGARHÖNNUÐUR
      • Guðjón L. Sigurðsson, Liska ehf.
AÐRIR HÖNNUÐIR OG SAMSTARFSAÐILAR
  • Basalt arkitektar,
  • Design Group Italia,
  • iGuzzini,
  • Bláa Lónið
VERKKAUPI
Bláa Lónið
ÁR

2018

CIE veitir aðgang að tveimur lýsingarritum vegna Covid-19

By Fréttir

CIE veitir frían aðgang að tveimur helstu ritum um útfjólubrátt ljós til sótthreinsunar.

Ritin eiga að hjálpa hönnuðum og rannsóknaraðilum að þróa lausnir til sótthreinsunar með UV ljósi.

Sjá frétt CIE

CIE hefur birt fjölda tækniskýrslna og alþjóðlegra staðla í gegnum tíðina um útfjólubláa geislun, mælingar á því, áhrif þess og notkun – þar með talið notkun þess sem leið til sótthreinsunar.

Til að styðja alþjóðasamfélagið á þessum tíma hefur CIE ákveðið að gera tvö af helstu ritum sínum á þessu sviði aðgengileg næstu þrjá mánuðina.

Ritin má finna hér:

LUCI gefur út 2019 árskýrslu sína

By Fréttir

“Connecting Cities With Light” árskýrsla LUCI 2019:

Ársskýrsla LUCI sem ber yfirskriftina “Connecting Cities With Light” eða Að tengja borgir við ljós og gefur árlega uppfærslu um starfsemi þeirra undanfarið ár. Árskýrslan inniheldur almenna útskýringar á LUCI netinu, stoðir, atburði, verkefni, auðlindir og skipulag þeirra.

Fréttina og skýrsluna er að finna í hlekk hér fyrir neðan og beinn hlekkur á skýrsluna er hér efst á síðunni.

https://www.luciassociation.org/luci-annual-report-connecting-cities-with-light-in-2019/

LUCI (Lighting Urban Community International) er alþjóðlegt net borga um lýsingu í þéttbýli.

LUCI, sem stofnað var árið 2002 að frumkvæði Lyon City, í dag, er samtök sem ekki eru rekin í hagnaðarskyni og sameina yfir 70 félaga og borgir um allan heim sem nota ljós sem tæki til félagslegrar, menningarlegrar og efnahagslegrar þróunar.

Myndir: “Connecting Cities With Light” the LUCI Annual Report 2019

Reykjavíkurborg er aðili að LUCI síðan 2016.

Hér má sjá viðtal við Ársæl Jóhannsson verkefnastjóra götulýsingar í Reykjavík við LUCI.

Íslensku lýsingarverðlaununum frestað ótímabundið.

By Tilkynningar

Í ljósi aðstæðna í samfélaginu vegna Covid-19 veirunnar hefur stjórn Ljóstæknifélagsins ákveðið að fresta íslensku lýsingarverðlaununum sem áttu að fara fram í lok mars ótímabundið. Unnið verður að því að finna nýja tímasetningu þegar málin skýrast frekar.

Við munum senda út frekari upplýsingar til félagsmanna og aðila innsendra verkefna síðar.

Með kveðju
Stjórn Ljóstæknifélags Íslands

Íslensku lýsingarverðlaunin – opið fyrir innsendingar

By Fréttir

Keppnin er opin öllum þeim sem hanna lýsingu og ljós á Íslandi.

Íslensku lýsingarverðlaunin eru verðlaun sem veitir frumlegum, skapandi og snjöllum hugmyndum
sem eru útfærðar á framúrskarandi hátt viðurkenningu.

Íslensku lýsingarverðlaunin

Opið fyrir innsendingar!

ATH SKILAFRESTUR LENGDUR TIL KL.12.00 ÞANN 4.MARS 2020!

Flokkar

Íslensku lýsingarverðlaunin eru veitt í fjórum mismunandi flokkum að þessu sinni.

Lýsingarverkefni innandyra

Lýsingarverkefni utandyra

Lampar og ljósabúnaður

Opinn flokkur

Ný heimasíða!

By Fréttir

Í gær þann 16.maí opnaði formlega ný heimasíða Ljóstæknifélags Íslands. Dagurinn er táknrænn því alþjóðlegur dagur ljóssins er haldinn hátíðlegur þennan dag.

Nýji vefurinn mun koma til með að þjóna starfsemi félagsins enn betur með bæði miðlun á fræðslu og utanumhaldi á faglegum þáttum sem tengjast ljósi.

Síðan er enn í þróun og mun þróast áfram með nýjum áherslum á faglegum samskiptum innan félagsins og á milli félagsmanna með tilkomu faghópa. Faghóparnir  munu verða sameiginlegur vettvangur innan LFÍ til umræðu og framþróun á viðkomandi sviði.

Við munum áfram segja fréttir af félaginu hér á síðunni en annar skemmtilegur fróðleikur um ljós og fréttir úr faginu mun flytjast alfarið yfir á Facebook síðu félagsins.

Smíðin á nýju heimasíðunni var í höndum Allra Átta og þökkum við þeim kærlega fyrir. Allra Átta mun svo vera okkur innan handar við þróun á síðunni og samhliða munum við kynna inn nýjar áherslur og þætti síðunnar þegar nær dregur.

Hugmyndir að nýjungum eru m.a aðsendar greinar, innri vefur félagsmanna og faghópa, instagram, upplýsingar um staðla og reglugerðir tengda ljósi, upplýsingar um skóla og nám, fyrirtækjaleit í félagatali eftir fagi/áherslum fyrirtækisins, styrktaraðilar (lógó), viðburðasíða, myndasíður o.fl.

Kær kveðja,
Stjórn LFÍ

Ef þú hefur hugmynd að efni inn á heimasíðuna eða nýjungum þá má senda okkur póst á lfi@ljosfelag.is
Ef þið eruð með góða frétt, fróðleik eða annað ljósatengt til deilingar á FB þá megið þið endilega senda okkur póst á lfi@ljosfelag.is eða hafa samband við okkur í gegnum FB síðu félagsins. 

Aðalfundur 28.maí 2019

By Viðburðir

Dagur: 28. maí 2018

Tími: 17:00-19:00

Staður: Sveinatunga, Garðatorg 7, Garðabæ

Ljóstæknifélag Íslands býður félagsmönnum til aðalfundar félagsins ásamt vettvangsskoðun um nýja fundar- og fjölnotaaðstöðu Bæjarskrifstofu Garðabæjar.

Dagskrá

Guðjón Erling Friðriksson bæjarritari tekur á móti okkur og býður fundinn velkominn.

Venjubundin aðalfundarstörf skv. félagslögum LFÍ.

Eftir fundinn gefst kostur á að skoða nýja og glæsilega fundar- og fjölnotaaðstöðu Bæjarskrifstofu Garðabæjar og Rósa Dögg Þorsteinsdóttir, lýsingarhönnuður mun segja okkur frá lýsingarhönnuninni í rýminu.

Til gamans má geta að félagar Ljóstæknifélagsins ættu að kannast við þetta nýja rými þó miklar breytingar hafi orðið á því, en þar var áður til húsa GH ljós.

Fundurinn verður á Bæjarskrifstofu Garðabæjar, Garðatorgi 7. Gengið er inn í salinn Sveinatunga inn af yfirbyggða torginu. Fundurinn hefst kl. 17:00.

Léttar veitingar í boði eftir fund.

Vinsamlegast staðfestið mætingu með skráningu hér til hliðar svo áætla megi sæti og veitingar. 

Kær kveðja, Stjórn Ljóstæknifélags Íslands

Skráning á viðburð

Vinsamlegsat fyllið út í alla reiti